008

التىنبەك سارسەنباەۆ: «تەاترعا ءبىر رەت كەلىپ، وتىز كۇن ايتىپ جۇرەتىن شەنەۋنىك ەمەسپىن» (ۆيدەو)

قازىر جۇرتتىڭ ءبارى ءوزىن جارنامالاۋعا جانى قۇمار. كۇنى كەشە عانا وعىز دوعان مەن Qazkom اراسىندا قازاق تىلىنە قاتىستى داۋ تۋىنداعاندا ەكس-دەپۋتات تاڭىربەرگەن بەردوڭعاروۆ ورىنسىز جەردەن كيىلىگىپ، داۋعا شوق ۇرلەپ، ءوزىنىڭ جارناماسىن جاساپ قالدى. ءتىپتى، ول ءوزىنىڭ كوزدەگەنىنە قول جەتكىزدى دەسەك تە بولادى. 

وسى رەتتە الاشتىڭ ارداقتى ازاماتى، مارقۇم التىنبەك سارسەنباەۆتىڭ كەزىندە «شىننىڭ ءجۇزى» باعدارلاماسىندا ايتقان تومەندەگى ويى كوپشىلىككە وي سالار دەگەن نيەتپەن سايتىمىزعا ادەيى جاريالاپ وتىرمىز.

التەكەڭ «نە دەيدى» دەيسىز عوي. بەلگىلى جۋرناليست قاسىم امانجول:

– التەكە، ءسىز مادەنيەت ءمينيسترى بولىپ تۇرعاندا تەاترداعى قويىلىمداردىڭ پرەمەراسىنا سيرەك باراتىنسىز. ءتىپتى، ءسىزدى تەاترعا مۇلدە بارمادى دەسە بولاتىنداي؟.. – دەپ كوكەيدە جۇرگەن ساۋالىن قويىپتى.

جۋرناليستىڭ سۇراعىنا التىنبەك سارسەمباەۆ ءوزىنىڭ مينيستر بولىپ تۇرعاندا وزگە مينيسترلەر سەكىلدى نوكەرلەرىن ەرتىپ، الدىڭعى قاتاردا وتىرىپ، جۇرتتىڭ نازارىن وزىنە اۋدارماعانىن ايتا كەلە، ويىن بىلايشا ساباقتاپتى:

– مەن تەاترعا بارعاندى جاقسى كورەمىن. بىراق مۇمكىندىگىنشە تەاترعا قاراپايىم كورەرمەن سەكىلدى بيلەتتى ءوز اقشاما ساتىپ الىپ، جۇرتپەن بىرگە قويىلىمدى تاماشالاعاندى جانىم قالايدى.

بىردە بەلگىلى رەجيسسەر بولات اتاباەۆ ءوزىنىڭ قويىلىمىندا مەنىڭ زالدا وتىرعانىمدى بايقاپ قالدى. سودان سوڭ تەاتر قىزمەتكەرلەرى سول كەزدەگى تەاتردىڭ ديرەكتورى تۇڭعىشباي جامانقۇلوۆ اعىمىزعا «تەاتردى مينيستر وتىر» دەپ تەلەفون سوعىپتى.

تۇڭعىشباي اعامىز قويىلىمنىڭ ەكىنشى بولىمىنەدە ۇيدە جاتقان جەرىنەن كەلىپ «التەكە كەلەتىنىڭىزدى نەگە كۇنى بۇرىن ايتپادىڭىز؟» دەمەسى بار ما؟

مەن سول كەزدە: «مەن سىزدەردى مازالاۋ ءۇشىن ەمەس، مىنا قويىلىمدى ازامات رەتىندە تاماشالاۋعا كەلدىم. زالدا ءوزىمدى مينيستر رەتىندە سەزىنگىم كەلمەيدى. قاراپايىم كورەرمەن رەتىندە رۋحاني ءلاززات الۋ ءۇشىن كەلدىم. مەن تەاترعا ءوز اياعىممەن كەلىپ، ءوز اياعىممەن كەتەتىن كوپ كورەرمەندەردىڭ ءبىرىمىن» دەپ جاۋاپ بەردىم.

جالپى، تەاترعا شابارمانداردى ەرتىپ، جۇرتتى دۇرلىكتىرىپ ءبىر رەت كەلىپ، وتىز كۇن ايتىپ جۇرەتىندەي ارەكەتكە بارۋعا بولادى. سونىمەن قاتار تەاترعا كوپ كورەرمەننىڭ ءبىرى رەتىندە جىلىنا ون رەت كەلىپ، ەشقانداي ساياسي جارناما جاساماۋعا بولادى، – دەپ تاماشا جاۋاپ بەرگەن ەدى.

ءيا، بولماشى دۇنيەدەن جارناما جاسىپ، جۇرتتى دۇرلىكتىرۋگە جانى قۇمار جۇرت التەكەڭدەي ازاماتتان ۇلگى-ونەگە السىن دەپ وسى دۇنيەنى ادەيى جازىپ وتىرمىز. ارينە، مۇنى ۇعاتىن كوكىرەك، تىڭدايتىن قۇلاق بولسا قانەكي؟

نۇرلان جۇماحان    

 

 

التىنبەك سارسەنباەۆ

پىكىرلەر

پىكىر