008

بالالار حيرۋرگياسى وزىق قوندىرعىمەن جابدىقتالدى

بۇگىن پەدياتريا جانە بالالار حيرۋرگياسى عىلىمي ورتالىعىندا وزىق قوندىرعىلارمەن جابدىقتالعان «Smart School»  وقۋ سىنىبىنىڭ تۇساۋكەسەر ءراسىمى ءوتتى.

سمارت-كلاستى ورتالىق ديرەكتورى ريزا بورانباەۆا مەن «سامسۋنگ» كومپانياسىنىڭ وكىلى اناستاسيا گۋلمەتوۆا اشتى.

– بۇگىن ءبىز ءۇشىن ايتۋلى كۇن. بالالارعا ۇلكەن قۋانىش سىيلاعان، وسى اسەم دە جارىق سىنىپتى جاساپ، زامان تالابىنا ساي جابدىقتاپ بەرگەن «سامسۋنگ» كومپانياسىنا شەكسىز العىسىمىزدى بىلدىرەمىز. بۇعان دەيىن ءبىزدىڭ كىشكەنتاي پاتسيەنتتەرىمىز بارلىق پاندەر بويىنشا پالاتالارىندا ءبىلىم السا، ەندى وسى سىنىپتا بىلىمدەرىن جالعاستىرىپ قانا قويماي، بوس ۋاقىتتارىن قىزىقتى دا ءتيىمدى وتكىزەتىن بولادى. ەرتەڭنەن باستاپ سۋرەت سالۋ، كونسترۋكتور قۇراۋ، اعىلشىن ءتىلىن ۇيرەنۋ، دويبى، شاحمات ۇيىرمەلەرى جۇمىسىن باستايدى. بۇل ءوز كەزەگىندە بالالاردىڭ تەزىرەك جازىلىپ، ساۋىعىپ كەتۋىنە وڭ اسەرىن تيگىزەدى دەپ سەنەمىز، – دەدى اشىلۋ سالتاناتىندا پەدياتريا ورتالىعىنىڭ ديرەكتورى ريزا بورانباەۆا.

يننوۆاتسيالىق وقۋ بولمەسى ونكولوگيالىق دەرتكە شالدىققان بالالارعا ارنالعان. ورتالىقتا بۇگىنگى كۇنى 100-دەن استام بالا ەم الۋدا.

– «سامسۋنگ» كومپانياسى قازاقستان بويىنشا ەلىمىزدەگى مەكتەپتەرگە وسى كۇنگە دەيىن 13 سمارت-كلاسس اشتى. ءبىز وسىنداي وقۋ سىنىپتارىنىڭ بالالاردىڭ، اسىرەسە، ونكولوگيالىق اۋرۋلارعا شالدىققان بالالارعا وڭ اسەرى تيەتىنىن رەسەيدەگى روگاچەۆ اتىنداعى ونكولوگيا جانە گەماتولوگيا ورتالىعىنان بىلدىك. بالالاردىڭ جازىلىپ كەتۋىنە ءبىز دە ءوز سەپتىگىمىزدى تيگىزۋ ءۇشىن ورتالىقتا ەم الاتىن بالالارعا بالالار كۇنىنە وراي سىيعا تارتۋدى ءجون كوردىك. باستى ماقساتىمىز بالالاردىڭ ساۋىعىپ كەتۋىنە ۇلەس قوسۋ، زاماناۋي شەشىم ارقىلى بالالاردىڭ قىزىقتى ءارى ءتيىمدى ءبىلىم الۋلارىنا مۇمكىندىك جاساۋ، – دەدى سامسۋنگ كومپانياسىنىڭ وكىلى بەرىك وماروۆ.

اتاپ وتە كەتەيىك، اتالمىش كومپانيا وتكەن جىلى انا مەن بالا ۇلتتىق عىلىمي ورتالىعىنا ءدال وسىنداي سمارت-كلاستى سىيعا تارتقان ەدى.

وسى زامانعا ساي ءبىلىم بەرۋ قۇرالدارىمەن جابدىقتالعان وقۋ سىنىبىندا بالالار ماتەماتيكا، تاريح، اعىلشىن ءتىلى جانە ت.ب. جالپى پاندەرمەن بىرگە شىعارماشىلىق جۇمىستارمەن دە اينالىسا الادى. سونداي-اق بۇل سىنىپتا مۋزىكا مەن ەرتەگىلەردىڭ كومەگىمەن تەراپيا سەانستارى وتكىزىلەدى. ورتالىققا كەلىپ ءدارىس بەرەتىن مۇعالىمدەر ساباقتاردى ءتيىمدى جانە قىزىقتى ەتىپ ونلاين رەجىمدە دە جۇرگىزە الادى. ونلاين تۇرىندە وتەتىن ساباقتارعا ەندى توسەككە تاڭىلعان بالالار دا قاتىسا الاتىن بولادى. دارىستەر جاڭا ينتەراكتيۆتى وقۋ ادىسىمەن جۇرگىزىلەدى. سىنىپ ۇلكەن ينتەراكتيۆتى تاقتامەن، ەكولوگيالىق تازا جيھازدارمەن قامتاماسىز ەتىلگەن. قاتىسۋشىلارعا ارنالعان 20 پلانشەت تە قويىلعان. سىنىپ ءىشى زامان تالابىنا ساي ارلەنىپ، بەزەندىرىلگەن. ورتالىقتا ەمدەلۋشى بالالار ساباقتاردى جاڭا وقۋ جىلىنان جاڭا فورماتتا وقيتىن بولادى. بۇگىن گەماتولوگيا بولىمىندە ەم الىپ جاتقان بالالار سمارت-سىنىپقا العاشقىلاردىڭ ءبىرى بولىپ وتىردى.

كەلەسى اپتادان باستاپ سۋرەت سالۋ، كونسترۋكتور قۇراۋ، اعىلشىن ءتىلىن ۇيرەنۋ، دويبى، شاحمات ۇيىرمەلەرى ءوز جۇمىسىن باستايدى. ۇيىرمەلەردى «HelpToday» قوعامدىق ۇيىمىنىڭ 10-عا جۋىق ەرىكتى وكىلدەرى تەگىن جۇرگىزەتىن بولادى. سىنىپتىڭ اشىلۋ سالتاناتىندا «HelpToday» قوعامدىق ۇيىمىنىڭ جەتەكشىسى ەلميرا اليەۆا ءدارىس بەرەتىن ۇستازدارمەن تانىستىرىپ، سىنىپتىڭ اشىلۋىمەن قۇتتىقتادى.

– «جاقسىلىق جاساساڭ، بالاعا جاسا» دەگەن دانا حالقىمىز. ورتاق قۋانىشىمىز قۇتتى بولسىن! ءبىز قاشاندا ەلىمىزدىڭ بولاشاعى بالالار ءۇشىن جاقسىلىق جاساۋعا ءازىرمىز. بالالاردىڭ ەمىن ۇزبەي، بىلىمدەرىن ارتتىرىپ، شىعارماشىلىق جاعىنان دا دامۋعا مۇمكىندىك بەرەتىن بۇل جوباعا اتسالىسقانىمىزعا قۋانىشتىمىز. بۇل اقپاراتتىق-كوممۋنيكاتسيالىق تەحنولوگيالار ءدارىس جۇرگىزۋ ءىسىن جەدەلدەتىپ، ساباقتاردى قىزىقتى ەتە تۇسەتىنىنە سەنىمدىمىز، – دەپ اتاپ ءوتتى ە.اليەۆا.

شارا بارىسىندا مويىن قاتەرلى ىسىگى دياگنوزىمەن جاتقان 10 جاستاعى ءاليمانىڭ اناسى گاۋحار يگەنباەۆا اتا-انالار اتىنان ءسوز سويلەپ، بالالار ءۇشىن جاسالىپ جاتقان قايىرىمدى ءىس ءۇشىن العىسىن ءبىلدىردى.

وزىق قوندىرعىلارمەن جابدىقتالعان «اقىلدى سىنىپتى» Samsung Electronics Central Eurasia كومپانياسى حالىقارالىق بالالار كۇنىنە وراي تارتۋ ەتتى. يگىلىكتى ءىس  «HelpToday» قوعامدىق ۇيىمىنىڭ جەتەكشىلىگىمەن ىسكە استى.

نازيرا جۇماقۇلوۆا

پىكىرلەر

پىكىر