008

پاشينيان ەكى ايدىڭ ىشىندە نە اتقاردى؟

نيكول پاشينياننىڭ ارمەنيا پرەمەر-ءمينيسترى اتانعانىنا ەكى ايدان استى. وسى ارالىقتا نە اتقاردى ول؟  يليا كۋسا ەسىمدى ۋكراين ساراپشىسىنىڭ مىنا ماقالاسىنا نازار اۋدارماي وتە المادىق.

1.  پاشينيانمەن اراداعى ەكى ايعا سوزىلعان تەكەتىرەستەن كەيىن سارگسياننىڭ وڭ قولى، ەرەۆان اكىمى تارون مارگاريان وتستاۆكاعا كەتتى.

2.  بيلىكتى بەت الدى ماقتايتىن ارمەنيا تەلەارناسىنىڭ باسشىلارىن ورنىنان الدى. قارجىلىق اۋديت جۇرگىزىپ، قىلمىستىق ءىس ءىس قوزعادى ۇستەرىنەن.

3. ەسكى ۇكىمەتتىڭ قۇرامىندا بولعان شەنەۋنىكتەردى سۇزگىدەن وتكىزدى.

ايماقتارداعى مەر مەن گۋبەرناتورلاردىڭ دەرلىگىن قىزمەتىنەن قۋدى.  

4. سارگسيانمەن سىبايلاس وليگارحتارعا تيەسىلى ءىرى سۋپەرماركەتتەرگە بويكوت جاريالادى.

الگىلەر باعانى تومەندەتۋگە ءماجبۇر بولدى. 

5. ارميان ساربازدارىنا ارنالعان گۋمانيتارلىق كومەكتى ۇيىنە تاسىعان گەنەرال مانۆەل گريگوريان مەن ايەلىنىڭ قولىنا كىسەن سالدى. قاماۋدان قورىققان گريگورياننىڭ ۇلى ء(ارى ەچميادزين قالاسىنىڭ اكىمى) سوچيگە قاشتى.

6. پرەزيدەنت سارگسياندى كۇزەتكەن ۆاچاگەل كازارياننىڭ 9 ملن دوللار مەملەكەت قارجىسىن قولدى قىلعانىن انىقتاپ، اباقتىعا جاپتى. 

7. ەلدىڭ بۇرىنعى پرەزيدەنتى روبەرت كوچاريانمەن بايلانىسى بار «سپايكا» كومپانياسىنىڭ وسى كۇنگە دەيىن سالىقتان جالتارىپ كەلگەنىن انىقتادى.

كوچارياننىڭ ۇستىنەن 2008 جىلى ەرەۆاندا شەرۋگە شىققان جازىقسىز جۇرتتى قۋدالادىڭ دەپ ءىس قوزعادى. ەكس-پرەزيدەنت رەسەيگە تايىپ تۇردى.

8. سەرج سارگسيانعا دا تىقىر تاياندى. ەكس-پرەمەردىڭ وتباسىنا قاراستى قورلاردى، قۇرىلىمداردى تۇگەلدەي ءسۇزىپ شىقتى. سارگسياننىڭ ءتورت بىردەي ءىنىسى – ساشيك، لەۆون، نارەك، ايكا جانە قارىنداسى اني سارگسيانعا ىزدەۋ جاريالادى. ءىس ناسىرعا شاپپاي تۇرا بەسەۋى دە شەتەل اسقان-تۇعىن.

9. قىزمەتىن اسىرا پايدالانعان اۋىلدىق جەردەگى اقىلداستار كەڭەسىنىڭ 71 جەتەكشىسىنىڭ ۇستىنەن قىلمىستىق ءىس قوزعادى پاشينيان.  

10. ەكس-قورعانىس ءمينيسترى ميكاەل ارۋتيۋنيانعا 2008 جىلى ەرەۆانداعى شەرۋدىڭ شىرقىن بۇزعانى ءۇشىن ىزدەۋ جاريالادى. ول دا ءىزىن جاسىرىن ۇلگەرىپتى. 

11. ەكولوگيالىق اپاتتىڭ الدىندا تۇرعان سيۋنيك وبلىسىنىڭ باسشىلىعىن مۇنداعى جاعدايدى ءوز كوزىمەن كورگەسىن جۇمىستان قۋدى.

12. رەسەيدەگى ارمياندار قۇقىعىن قورعايتىن جاڭا ۇيىم قۇردى. ەسكى ۇيىمدى ءتيىمسىز ءارى جەمقورلىققا باتقان دەپ تاپتى. ونىڭ جەتەكشىسى وليگارح ارا ابراميان تەرگەلۋ ۇستىندە.

13. ەلدەن جىراقتا جۇرگەن ارميانداردى وتانىنا قايتارۋ ماقساتىندا «ارمەنيا جۇرەگىمدە» دەيتىن جوبانىڭ تۇساۋىن كەستى.

14. «ارمەنيا ازىربايجانعا تاۋلى قاراباقتى قايتارىپ بەرسىن» دەگەن جيرينوۆسكي جەتەكشىلىك ەتەتىن پارتيا مۇشەسى ۆلاديمير ساۆەلەۆتى پارتيا قاتارىنان شىعارىپ تىندى.  

15. فەيسبۋكتە تىكەلەي ەفيرگە شىعۋدى داستۇرگە اينالدىردى. كۇندە كەشكە (كەيدە كۇن ارا)  جەلىدەگى جۇرت پاشينيانمەن پىكىرلەسىپ ءجۇر قازىر.

16.  ۇكىمەتتى، ءوز اكىمشىلىگىن Apple-دان ارمەنيادا جاسالعان ArmTab كومپيۋتەرلەرىنە كوشىردى. 

17. وليگارح سامۆەل كاراپەتيانعا تيەسىلى «تاشير گرۋپپ» كومپانياسىن جاعدايى تومەن وتباسىلار ءۇشىن ەلەكتر ءتاريفىن 10 درامعا ارزانداتۋعا كوندىردى. بۇعان ارەڭ يلىككەن كاراپەتيانعا دا تىقىر تاياپ قالدى.   

18. «گازپروم ارمەنيانى» تۇرمىسى تومەن وتباسىلار ءۇشىن گاز ءتاريفىن 20 پايىزعا تومەندەتۋگە مىندەتتەدى. جەڭىلدەتىلگەن بۇل تاريف ءبىر جىلعا جارامدى، ار جاعىندا مەرزىمىنەن بۇرىن وتكىزىلەتىن سايلاۋ دا كەلىپ قالادى.

 

دايىنداعان, دۋمان بىقاي

پىكىرلەر

پىكىر