008

كوشىم: “ساعاديەۆ ءسوز تىڭدامايدى”

ساعاديەۆتى ءسوز ەتىپتى. ۇشتىلدىلىكتىڭ ولقىلىقتارىن، لاتىن الىپبيى تۋرالى ويىن ايتقان ەكەن دوس كوشىم. بۇل تۋرالى Dalanews.kz حابارلايدى. 

«ۇشتىلدىلىكتى مەكتەپ باعدارلاماسىنا ەنگىزۋدىڭ امالدارى تىم تۇرپايى.

بالاعا ءبىرىنشى سىنىپتان باستاپ ءۇش ءتىلدى ۇيرەتۋ تىم اۋىر. بۇعاناسى قاتپاعان، وڭ-سولىن تانىماعان بالانىڭ باسىن قاتىرۋدىڭ قاجەتى شامالى.

بالانىڭ مورالدىق، پسيحولوگيالىق دايىندىعى تۇرعىسىنان مۇلدە مۇمكىن ەمەس دۇنيە بۇل. مۇنى ءسىز دە، ءبىز دە تۇسىنەمىز. تەك ءبىلىم ءمينيسترى بەت باقتىرار ەمەس.

ماعان سالسا ءۇش ءتىلدى ەنگىزۋدى ون جىلعا توقتاتار ەدىم. اسىقپايىق. لاتىن ءالىپبيىن مەڭگەرىپ الايىق الدىمەن. قوعامدىق ومىرىمىزگە كىرىكسىن. قولىمىز توسەلسىن، كوزىمىز ۇيرەنسىن.  

بالاعا 5-سىنىپقا دەيىن ورىس، اعىلشىن ءتىلىن تىقپالاۋدى توقتاتۋ قاجەت، جالپى.

ەكىنشى ماسەلە، ءبىلىم ءمينيسترى جوعارى سىنىپتاردا نەگىزگى ءتورت ءپاندى اعىلشىن تىلىندە وقىتام دەپ جىنىگىپ ءجۇر. بۇل ەندى تازا تىراشتانۋ. قالاي الىپ قاراساڭىز دا اقىلعا سىيمايتىن ارەكەت.  ۇلتتىق نەگىزدەن ايىرىلۋدىڭ ەڭ وڭاي جولى وسى.

ودان كەيىن مۇمكىندىك جوق. جارايدى، وتىز مىڭ ۇستازدى وقىتتىق دەلىك. امەريكادان، انگليادان ادام شاقىرتتىق دەلىك. بىراق سول ۇستازداردىڭ ساباعىن اعىلشىن تىلىندە انىق ۇعاتىن ءۇش ءجۇز مىڭ وقۋشى بار ما بىزدە؟

ايتۋدايىن ايتىپ جاتىرمىز. ۇرسىپ تا ايتتىق، جۇمسارتىپ تا ايتتىق. جوعارىعا جەتكەنى شامالى. ساعاديەۆ سەلت ەتكەن جوق. قارسىلىق كورسەتكەننەن باسقا امال قالمادى.

بولمايدى! بولدى. ءبىتتى. قارسىمىز. اقىرعى امال وسى. بۇتىن ءبىر ۇرپاقتى ءدۇبارا قىلماۋ ءۇشىن ءبىلىم مينيسترلىگىنىڭ شالا-شارپى جاسالعان جوبالارىنا كەسە كولدەنەڭ تۇرۋىمىز قاجەت. مەملەكەتتىك ءتىلدىڭ دارەجەسىن كوتەرە الماي جۇرگەنىمىزدەن ساعاديەۆ حاباردار ما ءوزى؟

ءوزىمىزدىڭ كوزقاراسىمىزدى، ۇستانىمىزدى ناقتى ايتاتىن ۋاقىت جەتتى الدەقاشان. بايقاساڭىز، ۇكىمەتتىڭ ءوزى ەكىۇداي كۇيدە وتىر. اۋەلى بيىلدان باستايمىز دەدى، كەيىن كەلەر جىلعا شەگەرەمىز دەدى.

توق ەتەرىن ايتقاندا، بيىلدان كەشىكپەۋىمىز كەرەك. كوپ قورقىتادى. بيلىك قوعامنان قورىقسا، قوعاممەن ساناسسا ۇشتىلدىلىك دەگەندى ۇمىتسىن. ساعاديەۆ ايىلىن تارتسىن.

دەگەن ەكەن دوس كوشىم “نەگە سولاي؟” باعدارلاماسىنا بەرگەن سۇحباتىندا. 

پىكىرلەر

پىكىر