008

Жетісулықтар Мұқали халықаралық экспедициясына аттанды

Алматы облысы әкімдігінің қолдауымен Елбасының «Болашаққа бағдар: Рухани жаңғыру» бағдарламалық мақаласы аясында Қытай Халық Республикасында Мұқали халықаралық экспедициясы өтеді. Оған қоғамдық пікір көшбасшылары, тарихшылар, жазушылар, суретшілер мен композиторлар қатысады. Бұл туралы Өңірлік коммуникациялар қызметі алаңында белгілі болды.

Ағымдағы жылдың 18-25 шілде аралығында өтетін экспедицияның мақсаты қазақ халқының ұлы Мұқалидың жүріп өткен жерлерімен танысу, рухани азық жинау.

Айта кетейік, Мұқали – хандардың ханы атанған Шыңғыс ханның атағы жер жарған төрт батырының бірі болған.Талай кескілескен айқастарда жеңістің туын желбіретіп, Шыңғыс ханның даңқты жолын жалғастырып, алпыс бес провинцияны бағындырған.

– «Тарихын білмеген халықтың болашағы бұлыңғыр» демекші, осы  экспедицияға баруымыздың себебі – өзіміздің Жалайыр тайпасынан шыққан бабамыз жайлы тың деректер алу. Мұқали батырымыз талай кескілескен айқастарда жеңістің туын желбірете білген. Ол Шыңғыс хан әскерінің төрт ірі қолбасшысының біріншісі болған және империядағы тоғыз төренің бірі атанған. Сондықтан мұндай қазақ батырымызды ұлықтау, насихаттау басты бағыттарымыздың бірі, – дейді халықаралық «Алаш» әдеби сыйлығының иегері, облыстық «Жетісу» газетінің бас редакторы Әміре Әрін.

Жиында сонымен қатар ҚР Жоғарғы мектеп академиясының академигі, ҚР еңбек сіңірген қайраткері Жалаири Өмірәлі де экспедицияның маңыздылығына тоқталып өтті.

– Тарихи құндылығы бар бұл шара болашақ ұрпаққа бабамызды тану барысында үлкен серпіліс бермек. Мұқали туралы да талай деректер сақталған. Соның айғағы – ҚХР-дағы жазушыларымыздың бірі Ақбар Мәжитұлының «Мұқали» кітабы. Кітап қытай тілінде жазылса да, оны  қазақ және ағылшын тілдеріне аударған. Бұл дегеніміз – батырымыз жайлы тек біз ғана емес шетел де оқып жатар деген сөз. Қорытындылай келе, осындай экспедицияны ұйымдастырып отырған Алматы облысының әкіміне қатысушылар атынан ризашылығымды білдіргім келеді, – дейді ол.

Сондай-ақ облыстық ішкі саясат басқармасының басшысы Алпысбаев Рустам экспедицияға тоқталып өтті.

– Ұйымдастырылып отырған экспедицияларымыз бұрын облыс ішінде ғана өтсе, кейін республика көлеміне шықты. Бүгінгі күні халықаралық деңгейге жетіп отырмыз. Осы сапарымыз  ақпараттық кеңістікте кеңінен таралмақшы. Қатысушылар шығармашылық адамдары болғандықтан, өз туындыларына Мұқали бабамызды қосады деп жоспарлануда, – деп қосты Р.Алпысбаев.

Экспедицияға 20 шақты адам қатысады. Олар  Бейжің, Шанси провинциясы кезіндегі Қытайдың астанасы Сиянь және Мұқали бабамыз Қытайды басқарған тұсындағы Юлинь қалаларымен танысады.

Пікірлер

пікір