008

«ءتورت اعايىندىنىڭ» باسشىسى سوتتالدى

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ەركىن ءىزباسار باستاعان قىلمىستىق توپقا سوت ۇكىم شىعاردى، – دەپ حابارلايدى قازاقپارات.

اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا ەركىن ءىزباسار باستاعان قىلمىستىق توپقا قاتىستى قىلمىستىق ءىس وتكەن جىلى باستالدى.

قىلمىستىق ءىس مۇناي ۇرلىعى، ۇيىمداسقان قىلمىستىق توپ قۇردى، مۇنايدى زاڭسىز تاسىمالداۋ مەن ساتۋ، رەيدەرلىك جولمەن بيزنەستى تارتىپ الۋ باپتارى بويىنشا قوزعالىپ، سوت پروتسەسى جارتى جىلدان استام ۋاقىتقا سوزىلدى.

سوتتا ەركىن ءىزباسار مەن ونىڭ كومەكشىسى سانالعان اۋحات قاليەۆتى ۇستاۋ وپەراتسياسى مەن ءتىنتۋ جۇرگىزۋى كورسەتىلدى.

ءىس ماتەريالىنا سۇيەنسەك، مۇناي «سنپس-اقتوبەمۇنايگاز» اق مەن «ساعىز پەترولەۋم» جشس-ءنىڭ بىرنەشە ۇڭعىماسىنان ۇرلانعان. ءىرى مۇناي كومپانيالارى سوت وتىرىسى كەزىندە شىعىندى ءوندىرۋدى تالاپ ەتتى.

ال سوتتالۋشىلار شىعىندى قايتا ەسەپتەۋدى سۇرادى. سوت وتىرىسى كەزىندە سوتتالۋشىلاردىڭ ءبىرى ءوز كىناسىن مويىندادى.

ال بۇگىن وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا سوت ۇكىمى شىقتى. ايتا كەتەيىك، ءىس بويىنشا بارلىعى 26 ايىپتالۋشى بار. سوت ۇكىمىمەن ەركىن ءىزباسار 12 جىلعا سوتتالىپ، قىلمىسپەن تاپقان مۇلكى تاركىلەندى.

ال ونىڭ جانىندا جۇرگەن اۋحات قاليەۆ 11 جىلعا، سول جىلدارى وبلىستىق ءىىد باستىعىنىڭ ورىنباسارى قىزمەتىن اتقارعان راحات احانوۆ 5 جىل 3 ايعا سوتتالدى.

بۇرىنعى پوليتسيا قىزمەتكەرى ءومىر بويى قۇقىق قورعاۋ ورگاندارىندا جۇمىس ىستەي المايدى، پوليتسيا پولكوۆنيگى شەنىنەن ايىرىلدى.

سوتتالۋشى ادايبەك سارسەنوۆ 3 جىلعا، نۇربولات قايىرباەۆ 3 جىلعا، ايبەك تىلەۋعازيەۆ 2 جىلعا،  مۇحانبەت شاۆلەتوۆ 3 جىلعا، بولاتبەك بەكەتوۆ 8 جىلعا، جاندوس اقماعامبەتوۆ 3 جىلعا، جانگەلدى وتەگەنوۆ 3 جىل 9 ايعا، رۋسلان دەرمۇحانوۆ 3 جىل 9 ايعا، بەكجان قۇلتاەۆ 3 جىل 9 ايعا، نۇرلان نوعاەۆ 8 جىلعا، ساياسات ءدۇسىپوۆ 3 جىلعا، سۇلەيمەن سۇگىرباەۆ 5 جىلعا، مۇرات تۇرجانوۆ 8 جىلعا سوتتالىپ، 8 جىلعا باسشىلىق قىزمەت اتقارا المايدى. سەرگەي ساۆچەنكو 3 جىلعا، ءبىرجان امانقۇلوۆ 11 جىلعا، ەربول تەكتىعۇلوۆ 4 جىل 6 ايعا، قايىركەلدى ىزتۇرعانوۆ 6 جىلعا، نۇرلىبەك تونتاەۆ 7 جىلعا، جانات تەكتىعۇلوۆ 3 جىل 9 ايعا، كادىرجان پانگەرەيۇلى 7 جىلعا، مۇرات قۋانىشەۆ 3 جىل 9 ايعا، قارتجان قالدىمۇرات 11 جىلعا باس بوستاندىعىنان ايىرىلدى. ال اماندوس ەسەنعاليەۆ قىلمىستىق جاۋاپكەرشىلىكتەن بوساتىلدى.

پىكىرلەر

پىكىر