008

جاڭا تۇجىرىمداما تۇركىستان وبلىسىننىڭ اۋىل شارۋاشىلىعىن العا باستىرادى

بۇل تۋرالى تۇركىستان وبلىسى اكىمدىگىندە وتكەن سەلەكتورلىق جيىندا ءوڭىر باسشىسى جانسەيىت تۇيمەباەۆ اۋدان، قالا اكىمدەرىنە ايتىپ، اۋىل شارۋاشىلىعىن دامىتۋدىڭ كەشەندى جوسپارىن ازىرلەۋدى تاپسىردى. ەندىگى كەزەكتە وبلىستىڭ ەكونوميكالىق درايۆەرى اۋىل شارۋاشىلىعى سالاسى ەكەنىن العا تارتقان اكىم سالانى مىقتاپ قولعا الۋ قاجەتتىلىگىن مىندەتتەدى.

كۇن ءتارتىبى بويىنشا «تۇركىستان وبلىسى اگروونەركاسىپ كەشەنىنىڭ 2017-2021 جىلدارداعى (اوك) دامۋ باعدارلاماسىنىڭ» 2018 جىلدىڭ 6 ايىنىڭ قورىتىندىسىن جاساعان وبلىستىق اۋىل شارۋاشىلىعى باسقارماسىنىڭ باسشىسى سەرىك تۇربەكوۆ سالاداعى اتقارىلعان ىستەرگە توقتالدى.

– وتكەن جارتى جىلدىقتاعى سالاداعى جالپى ءونىم كولەمى 146,4 ملرد.تگ قۇراپ، وتكەن جىلدىڭ ءتيىستى كەزەڭىمەن سالىستىرعاندا 25,4 ملرد. تگ. ارتقان. رەسپۋبليكادا ءونىم كولەمى بويىنشا وبلىسىمىزدىڭ ۇلەسى 14,6%-دى قۇراپ، 2 ورىنعا يە. اۋىل شارۋاشىلىعى ەكسپورتىنىڭ كولەمى 68,6 ملن. اقش دوللارىن قۇراپ 18,2 % ارتتى. بۇدان بولەك، بۇگىنگى تاڭدا وبلىس بويىنشا 60 مىڭنان اسا ءۇي شارۋاشىلىقتارى مەن شاعىن فەرمەر مۇشەلەرىنەن قۇرالعان 704 اۋىل شارۋاشىلىعى كووپەراتيۆتەرى تىركەلىپ، جۇمىستارىن جۇرگىزۋدە، – دەدى باسقارما باسشىسى.

2018 جىلدىڭ ءى جارتى جىلدىعىندا جەتكەن سالاداعى وزگە دە جۇمىستاردى بايانداعان س.تۇربەكوۆكە ايماق باسشىسى سوڭعى اكىمشىلىك اۋماقتىق وزگەرىستەرگە بايلانىستى اگروونەركاسىپ كەشەنىن دامىتۋدا قانداي باعىتتارعا باسىمدىق بەرىلەتىنىن سۇرادى. وبلىستاعى جاسىل بەلدەۋ ايماعىن ۇلعايتىپ، مال شارۋاشىلىعى سالاسى مەن تامشىلاتىپ سۋعارۋ جۇيەسىن مىقتاپ قولعا الۋ قاجەت دەگەن باسقارما باسشىسىنىڭ جاۋابىنا قاناعاتتانباعان اكىم جان-جاقتان عالىمداردى شاقىرىپ، كەشەندى تۇجىرىمداما جاساماسا، سالاداعى جۇمىستاردىڭ اقسايتىنىنا الاڭداۋشىلىق ءبىلدىردى.

– ءبىرىنشى كەزەكتە وبلىستىڭ ەكونوميكالىق درايۆەرى بولىپ اۋىل شارۋاشىلىعى سالاسى تابىلادى. سوندىقتان 1 اي مەرزىمدە ءاربىر اۋدان كەسىندىسىندە اۋىل شارۋاشىلىعىن دامىتۋدىڭ كەشەندى جوسپارىن ازىرلەۋدى تاپسىرامىن. سونىمەن بىرگە، سالا بويىنشا ۇكىمەت بەكىتىپ بەرگەن ينديكاتورلاردىڭ ورىندالۋى قاتاڭ باقىلاۋعا الىنسىن، – دەدى ج.تۇيمەباەۆ.

باسقوسۋدا وسى سىندى وزگە دە تاپسىرمالار جۇكتەگەن وبلىس باسشىسى سۋ شارۋاشىلىعى نىساندارىنىڭ دا رەسپۋبليكالىق مەنشىككە وتكىزۋ جۇمىستارىن جەدەلدەتۋدى مىندەتتەدى. سونداي-اق، اق التىندى ايماق سانالاتىن وڭىرىمىزدە ماقتا زيانكەستەرىمەن كۇرەسۋگە بولىنەتىن پرەپاراتتاردىڭ شارۋالارعا جەتكىزىلۋىن قامتاماسىز ەتۋ ماسەلەسىن رەتتەۋدى تاپسىردى.

تۇركىستان وبلىسى اكىمىنىڭ ءباسپاسوز قىزمەتى

پىكىرلەر

پىكىر